جيزال خوري: مساء الخير. هل عاد لبنان عنواناً جديداً للمواجهة في الشرق الأوسط؟ صباح الثالث من الشهر الجاري أقرَّ مجلس الأمن القرار 1559 الذي دعا فيه إلى انسحاب جميع القوات الأجنبية من الأراضي اللبنانية, وإلى عدم التدخل في الآلية الانتخابية اللبنانية لجهة التمديد للرئيس المنتهية ولايته. ذلك على خلفية الجو السوري الضاغط في العلن من أجل تمديد للرئيس إيميل لحود المنتهية ولايته. وفي مساء اليوم نفسه أقرَّ مجلس النواب اللبناني التمديد فبات لبنان الرسمي مثله مثل سورية على تعارضٍ مع الأمم المتحدة, ويوم أمس جاء وليم بيرنز المبعوث الأميركي الخاص لمنطقة الشرق الأوسط ليكرّر الطلب الأميركي لسورية بسحب قواتها من لبنان ووقف التدخل في الشؤون السياسية اللبنانية.

ضيف برنامج بالعربي الليلة ومباشرةً على الهواء هو الرئيس اللبناني الأسبق وأحد أبرز وجوه المعارَضة اللبنانية الرئيس أمين جميّل, مساء الخير فخامة الرئيس.
أمين جميّل: مساء الخير.
جيزال خوري: مابعرف إذا رئيس سابق ورئيس أسبق رح نصير يعني شواذ؟
أمين جميّل: على كل حال الرئاسات شفنا شو عملوا فيهم بقى.
جيزال خوري: شفنا شو صار.
جيزال خوري: إذا بتسمح نبدأ تقرير إعداد كارين طربيه.

كارين طربيه: رئيس جمهورية سابق ولولاية واحدة فقط, صفة نادرة في الأنظمة العربية شكَّلت خصوصية لبنان التي يبدو أنها إلى زوال بعد سيطرة قاعدة التمديد والتجديد, 28 أيلول 1988 ربع ساعةٍ قبل انتهاء ولايته, الرئيس أمين الجميّل يُسلم السلطة لحكومة انتقالية برئاسة العماد ميشيل عون لعدم انتخاب رئيسٍ يخلفه, يوم ذاك لم تنجح زيارة الجميّل إلى دمشق بتجنيب لبنان فراغاً رئاسياً، بعدما لقي مرشح الأسد مخايل الضاهر رفضاً واسعاً في بيروت التي غادرها الجميّل فور انتهاء ولايته ليبقى 12 سنة في المنفى أستاذاً محاضراً في الجامعات الفرنسية والأميركية. وُلد أمين بيار الجميّل في العام 1942 في بكفيّا, والده الشيخ بيار الجميل مُؤسس حزب الكتائب, درس الحقوق في جامعة القِدِّيس يوسف قبل أن يُصبح في العام 1970 أصغر نائب في البرلمان بعد وفاة خاله موريس الجميّل لُينتَخب في العام 1982 رئيساً للجمهورية على أثر اغتيال شقيقه بشير بعد 20 يوم من انتخاب الأخير رئيساً للبلاد، الجميّل الذي رَئِس لبنان في أصعب حَقَبات تاريخه السياسي وُصف بالاعتدال والانفتاح على العرب, لكنه وُسم باتفاق 17 أيار الذي رفض توقيعه, عاد إلى لبنان بعد وفاة الرئيس السوري حافظ الأسد لينضمّ سريعاً إلى صفوف المعارَضة كعضوٍ أساسي في تجمّع قرة شهوان المعارض، بعد أن سعى لجمع القاعدة الكتائبية حوله من جديد في محاولة لاسترجاع خط وشرعية الحزب المنُقسم، اليوم ماذا يقول أمين الجميّل في المشهد اللبناني المتأزم من خلال موقعه المزدوج كرئيسٍ سابق ومعارضٍ حالي.

جيزال خوري: فخامة الرئيس نحنا بتعرف برنامجنا شوي قصير بالنسبة للكثير من البرامج السياسية المحلية.
أمين جميّل: خير الكلام ما قلّ ودلّ على كل حال.
جيزال خوري: صحيح. فأنا رح أدخل يعني مباشرةً بالموضوع إذا بتسمح, هناك أزمة لبنانية كبيرة, في هناك أزمة دولية لبنانية تجاه الدول وأزمة طبعاً سورية، يقول وليد جنبلاط: أن النظام الطائفي انتهى وبدأ النظام الرئاسي, يكتب سمير فرنجية اليوم في ملحق النهار ويقول: أن الجمهورية الثانية انتهت، طيب شو بدأ؟
أمين جميّل: يعني بعتقد الجمهورية اللبنانية مش لحالها عم تتطور في.. صار في زلزال في المنطقة العربية ككل من سقوط الاتحاد السوفيتي وسقوط حيط برلين مروراً بعدين لا سيما بحرب العراق وبعدين تداعيات 11 أيلول وما شابه ذلك, يعني في تطورات كبيرة حصلت، بدأت على كل حال.. يعني اللّي عم بتغير مش بس بلبنان كل المنطقة عم تتغير، وقال حِكي عنها الرئيس جورج بوش الأب لما قال.. طرح شعار العالم الجديد new word order  أو نظام العالم الجديد واليوم الرئيس جورج دبليو بوش عم بيطبق هذا الشعار شعار والده new word order النظام العالمي الجديد, وهالشيء هذا أكيد بتناول كذلك الأمر لبنان, كل المنطقة عم تتغير ولبنان ما بقدر يكون عم بيغرد خارج سربه, أما بما يتعلق ببعض الكلام أن النظام الرئاسي ما بعتقد فينا نقول نظام رئاسي أو نظام جمهوري، هذا نظام التبعية لا أكثر ولا أقل, معروف أنه طالما الرئيس بيتعيَّن من الشام وهيك تبين جلياً بهالمرحلة الأخيرة، الحكومة عم تتعيّن بالشام, مجلس النواب عم يُنتَخب تقريباً تعيين بشكل بنعرفوا بشكل انتخابي أعرج ومداخلات بالعمليات الانتخابية, انحكى عن المحادل وعن التراكتورات وكل ما شابه ذلك, فإذاً بعتقد نحنا ما فينا اليوم نحكي بنظام رئاسي, بقدر ما فينا نحكي بنظام التبعية ولبنان عم بكون لسوء الحظ مغلوب على أمره وسياسته مسلوبة..

جيزال خوري[مقاطعةً]: بس لبنان اليوم عم بيغرد خارج سرب يعني النظام العالمي الجديد.
أمين جميّل: بالعكس.
جيزال خوري: يعني لبنان في خطر على ديمقراطيته, في خطر على تداول السلطة معه, ولبنان يعني إذا عم بتقول هناك هيمنة سورية، هناك هيمنة بلد على بلد في الوقت اللّي ما عدنا نشوف هالشي يمكن أو هذا الزلزال في العالم العربي؟
أمين جميّل: يعني على كل حال أنا بعتقد في أمور كتير بدأت تتغير، ولبنان بدو يتغير, لبنان اليوم غير لبنان الأمس في تطورات جديدة, نحن أمام استحقاقات, استحقاقات أولاً داخلية, خلينا نعترف أنه منذ فترة طويلة لم تتحقق وحدة وطنية مثل ما تحققت بالفترة الأخيرة لما بيان البطرك مع بيان مفتي السنة والشيخ عبد الأمير قبلان رئيس الشيعة, ووليد جنبلاط عنده دروس، كلهم عم يوقفوا موقفاً واحداً ضد التجديد ضد التمديد والمس بالدستور, وهنيك فعاليات.. وهناك كذلك الأمر فعاليات سياسية من السنة.. من المسيحيين والمسلمين, كلهم ناشدوا, طالبوا بتداول السلطة إلى ما هنالك..
جيزال خوري[مقاطعةً]: بس فخامة الرئيس..
أمين جميّل: فاليوم في إذاً في وحدة وطنية حقيقية من أجل التغيير وهذا الشيء عم بيترافق بالوقت الحاضر مع كذلك الأمر رغبة دولية بالتغيير القرار 1559 جاء يؤكد مطالب الشعب اللبناني وكل هالتوجه اللبناني الجديد اللّي عم بيطالب بالتغيير.

جيزال خوري: صحيح, بس حزب الله مثلاً طرح استفتاء شعبي بالنسبة للتمديد..
أمين جميّل: نعم.
جيزال خوري: إذا منحكي هالشي يعني مثلاً لإخواننا في الدول العربية بيقولوا في 96 نائباً صوَّتوا مع التمديد, إذا في مظاهرة هون ضد التمديد في قدها يعني مع التمديد.
أمين جميّل: نعم.
جيزال خوري: فكيف فينا نقول اليوم أنه فيه إجماع وطني؟

الديمقراطية التوافقية في لبنان

أمين جميّل: أنا بواجه السيد حسن نصر الله بكلام الشيخ محمد مهدي شمس الدين اللّي هو رئيس.. كان رئيس مجلس الشيعي الأعلى - الله يرحمه- كان حقيقةً من المواطنين اللّي حقيقةً لهم يد بيضاء على الوطن، وعمل كتاباً قبل وفاته اسمه "وصايا" بهالكتاب بيؤكد على ضرورة اعتماد الديمقراطية التوافقية، وبيناشد الشيعة ما يمشوا إطلاقاً بهالدعوات, دعوات الديمقراطية.. ديمقراطية الأكثرية لأنه هيدي بتضر بمصلحة الشيعة بالذات وبالمصلحة الوطنية, فبيجاوب على السيد نصر الله بيجاوب عليه الشيخ مهدي شمس الدين.
جيزال خوري: نعم.
أمين جميّل: بالإضافة إلى أنه نحنا مظبوط اللّي عم بيقوله الشيخ محمد مهدي شمس الدين ديمقراطيتنا ديمقراطية توافقية وليست ديمقراطية تعددية هذه من جهة، من جهة ثانية كلنا منعرف وهذا سبق وقلته بالمقدمة ما بدي ارجع أنه الانتخابات كانت انتخابات بالواقع مزوَّرة, وانتخابات ما بتعبر إطلاقاً عن رأي الشعب اللبناني؛ لأنه قانون الانتخاب كان انتخاب أعرج, كان انتخاب على القياس, وطريقة التعاطي بالانتخابات كانت طريقة تعاطي قمعية، وأدَّت إلى تزوير كبير بالانتخابات, تزوير الإرادة الوطنية على كل حال.
جيزال خوري: طيب بس وقت الرئيس لحود قال: أنا بدي أطوي يعني صفحة الماضي..
أمين جميّل: نعم.
جيزال خوري: يعني بدو.. عم بيمد يده للحوار في عدة أمور, يعني مثلاً حكيت عن قانون الانتخاب ممكن مثلاً يصير في قانون انتخاب يوافق يعني مطالب المعارضة, ممكن أنه يُفرج عن الدكتور سمير جعجع, ممكن أن يعود العماد ميشيل عون, وممكن أن تشارك المعارضة إذا قبلت طبعاً في حكومة الوفاق الوطني, طيب شو الإغراءات اللّي ممكن تقبلوا فيها؟ وشو إنه اللّي ما ممكن تقبلوا فيه؟ هل هالنقاط موجودة على البحث يعني؟
أمين جميّل: أنا بقدر طمأنك ما في ولا لبناني بدو يقتل الناطور كلنا بدنا ناكل عنب, يعني ما حدا منا سلبي بدنا نحنا شيئاً إيجابياً, بس المؤسف أنه هالست سنوات اللّي مرقوا مش قضية الناطور والعنب, جابوا تراكتور وجرفوا كل الكرمة، ما بقى في جنس العنب وجنس الناطور, قتلوا الناطور وقلعوا العنب الشتل من جذورها..
جيزال خوري: هلأ بيرجعوا بيزرعوا..
أمين جميّل: لذلك المكتوب بينقرا من عنوانه.
جيزال خوري: نعم.
أمين جميّل: نحنا ما حدا منا سلبي هالبلد بلدنا, والوطن وطنا, كلنا قلبنا عليه, أولادنا بدنا نبقيهم بهالبلد ما بدنا بقى يسافروا, ما في عيلة بتحكي معها إلا بتقول لك عندي ولدين أو ثلاثة موجودين برَّه, أو إذا عنده ولد بعده هون عم بيتعلم وبياخد الشهادة ناطر يخلِّص الشهادة حتى يلاقي له وظيفة في الخارج, فهذا اللّي إحنا ما بدنا إياه, نحنا مَـنَّا تسلاية عم نخرب بلدنا، بالعكس نحنا بدنا نبني هالبلد, المؤسف أنه طيلة هالست سنوات.. اللّي ما قدر يعمّر طيلة 6 سنوات وما قدر يحقق وفاق طيلة 6 سنوات مَنِّي عارف بيقدر ممكن يحققها بعد 3 سنوات؟! متل ما ذكرت لك يمكن حقق مظبوط أعجوبة إيميل لحود، أنه حقق الوحدة الوطنية مظبوط بس حققها ضده لماّ القيادات الروحية والقيادات السياسية بمعظمها سوادها الأعظم توافق على عدم المس بالدستور وعدم التجديد يعني هذه صارت وحدة وطنية, وإنما صارت وحدة وطنية ضده, فإذاً نحنا ما عنا مشكلة, هلأ هو بيعرف شو لازم ينعمل, لشو يسألنا؟ بيعرف كل الهرطقات اللّي صارت, كيف نايب مثلاً ينتخب وتاني يوم بيطعنوا له بنيابته, بيتعيّن واحد أخذ 2% بتعيّن محله, وكيف كل الهرطقات عم بتصير مرسوم التجنيس.. يعني مجموعة هرطقات: قمع الحريات, وقضية وضع اليد على الأحزاب, تنصيب قيادات زور على أحزاب تاريخية بالبلد, يعني في مجموعة هرطقات حصلت, طيب.. خلي يتفضل بالأول.. لشو بدو رأينا؟ هو بيعرفهم, بعرف هوّ من وين بدو يبلش.. خلي بالأول يبلش وبعدين بنشوف لكل حادث حديث, إنما اللّي بيجرِّب مجرَّب بتكون عقلاته مخرَّب بقول المثل اللبناني, فنحن على يعني هالست سنوات بعدين في السنة الجاية في عنا أول ما يجي مجلس النواب بدو يبلش بقانون الموازنة, بعدين بقانون الانتخابات, بعدين بصير انتخابات, يعني راحت سنة هيك على الفاضي, والسنة الثانية أبصر شو بدو يجدّ علينا من تداعيات القرار 1559 تبع الأمم المتحدة, ويمكن غير قضايا, بتكون خلصت الولاية, يعني وين بدو يعمل مصالحة..
جيزال خوري: إيه بس أنتم قلتم بدكم تصحيح الخطأ..
أمين جميّل: نعم.
جيزال خوري: شو يعني؟
أمين جميّل: هو يبعرف الرئيس لحود.. هو بيعرف..
جيزال خوري[ضاحكة]: بس نحنا ما بنعرف!
أمين جميّل: هو بيعرف.. هو بيعرف.. كل الهرطقات اللّي صارت هو يبعرفها، ما في لزوم نحكي عنا؛ لأنه هِنّ عملوها.. هنّ عملوها..
جيزال خوري: إذا.. كل هل الأشياء إذا انعملت بصير في مشاركة بالحكم؟
أمين جميّل: يعني بالأول خلي، نحنا على كل حال ما حدا طلب رأينا بكل شي عم بصير, ما حدا طلب رأينا بكل هالأمور اللّي عم بتصير, في قضايا هرطقات طويلة عريضة حصلت, جرائم بحق الوطن خليها تتصحح, قضية الحريات وين صارت؟ يُستعاد حد أدنى من الحريات, تُرفع اليد عن الأحزاب, هيدي ما بدا حوار, تُرفع اليد عن الأحزاب, تُرفع اليد عن الناس الموقوفين ظلماً, الناس اللّي منفيين ظلماً, الناس اللّي عم بتعذبوا بحياتهم اليومية لأنه ما عنده واسطة من هيدا أو من هداك, يعنى معروفة.. الوضع معروف شو هو, والحكم بيعرف وين العلة, شو بدو؟ خلّيه يبلّش بالأول يفرجينا حسن نية، بعدين لكل حادث حديث.
جيزال خوري: فخامة الرئيس كنت عند غبطة البطريارك.
أمين جميّل: نعم.
جيزال خوري: الديمان, يعني حتى نمت يعني في البطركية ومشيتوا سوا يعني شو حكيتوا بهالموضوع؟
أمين جميّل: يعني على كل حال البطركية بيتنا وغبطة البطرياريك هو بَيّنا, من الطبيعي أنه نتردد وأنا منّا أول مرة بِطلع على الديمان ولا آخر مرة بنام بالديمان.
جيزال خوري: بس كأنه كانت خلوة يعني..
أمين جميّل: ما كانت خلوة لا.. نحنا أنا على طول على تواصل مع غبطة البطرك في يعني جو حميم بيناتنا..
جيزال خوري: شو جو غبطة البطريارك؟ يمكن الرئيس لحود يروح يتغدّى عنده الأسبوع المقبل.

أمين جميّل: لأ ما في شك أكيد (بكركي) مفتوحة لكل الناس, كل العالم حتى الخطَأة بيجوا بيعترفوا حتى يتوبوا عن أخطائهم.. يمكن جاية يتوب عن خطئه ما بنعرف نحنا.. إذا طلع ما حد بيعرف شو طلع يعمل؟! على كل حال البطرك قلبوا مفتوح وكمان مستعد يعرّف أي أنسان إذا جاي يعترف بخطيئته ويعوّض وعنا بالديانة المسيحية لما الواحد بيعترف بخطيئته قبل ما يعطيه الحل للخوري بيعمل له قصاص, في قصاص بدو يسمِّع صلاة معين وبدو يقوم بقصاص معين وبدو يتعهد أنه يرجع عن الخطأ, يعني نحنا بنتمنى أن هذا الشيء يتمّ يطلع لعند البطرك يعترف عنده، ويقبل بالقصاص ويعترف بعدين..
جيزال خوري: شو القصاص يعني عندكم؟
أمين جميّل: يعني عندنا يعني العودة عن الخطأ, كل هالأخطاء.. ويعوّض عن كل هالهرطقات.. في ناس بالحبوسة لازم يطلعوا من الحبوسة, في ناس في المنفى..
جيزال خوري: شو جو البطرك؟
أمين جميّل: في أحزاب مطوَّقة, في حريات.. حقوق الإنسان مَنَّا محترمة، في سيادة البلد, نرجع نعيد لهل البلد كرامته, نرجع نعيد للمواطن عنفوانه, يعني في قضايا كثيرة يعني.. ما بدنا هلأ نذكرها لأنه سجل.. أنا بعطيكِ بس مثل بسيط يعني، يعني من.. أنا برجع لتصريح عملوا أخوه لرئيس الجمهورية اسمه الأستاذ نصري لحود, رئيس نصري لحود, كان رئيس المجلس الأعلى للقضاء..
جيزال خوري: صحيح.
أمين جميّل: يعني أعلى سلطة قضائية, عمل حديثاً تقريباً صفحة كاملة بجريدة السفير من تقريباً سنة يوم اللّي طلع فيه على التقاعد, قال كلاماً بالقضاء ما قاله مالك بالخمرة! يعني حكى أنه ما في قصر عدل, في قصور القضاة, كل قاضي بنى قصر, وكل هذا بحماية الدولة, بحماية السلطة ولمصلحة السلطة, جعلوا من الفساد.. جعلوا من الفساد عنصر أساسي من طريقة الحكم, لأنه ما قدروا يجمعوا شعبية بالطريقة التقليدية جمّعوا شعبية بالفساد يعني بدهم يشتروا العالم شراء, حتى ما بقى في مواطن صار في زبون! ما بقى.. مفهوم الوطنية ما بقى موجودة, يعني كلها هيدي ما بدّا تفسير, خلي يسأل أخوه شو كان بيعني بكل الكلام اللّي قاله, ويبلشوا من هون, يبلشوا بالقضاء, يرفعوا يدّن عن القضاء..
جيزال خوري: إذا بتسمح فخامة الرئيس رح نتوقف شوي ومنرجع نحكي عن الانسحاب السوري والقرار 1559.
    [فاصل إعلاني]

1559 الخطوة الأولى للتغيير

جيزال خوري: فخامة الرئيس أمين الجميّل أنت كمتابع يعني سياسي وكرئيس سابق بدي منك تفسير قرار 1559 اللّي في ناس اعتبروه شغلة كتير مهمة في مقاطعة نوعاً ما دولية للبنان وسورية, وفي.. مثل وزير الاعلام السوري اللي اعتبره انتصاراً لسورية.
أمين جميّل: يعني بعتقد الاعتبار.. ما بعتقد لهالدرجة الوزير السوري غبي حتى يعتبره هذا انتصار لسورية, إنما هذا من باب التمويه ومحاولة يعني الهروب إلى الأمام, إنما القرار 1559 قرار كتير مهم، وهذا بعتقد خطوة نوعية خطيرة جداً بالنسبة للبنان, وهذا اللّي بدو يسرّع مسار التغيير بلبنان, نحنا على كل حال هالقرار 1559 ما هو إلا تأكيد للشيء اللّي كنا نحنا عم نقوله, أول بيان أول نداء صدر عن البطرك والمطارنة سنة 2000 بأيلول بسنة 2000 يعني من أربع سنوات كان عم بيأكد أولاً: على ضرورة الانسحاب السوري، اثنين: على احترام سيادة لبنان، وثلاثة: على ترتيب وضع الجنوب, ورجعت كل البيانات بعدين لا سيما بعد القرار 425.. تطبيق القرار 425 وانسحاب إسرائيل من لبنان.. من الجنوب اللبناني، كذلك الأمر رجع البيانات.. كل البيانات السياسية تبعنا.. البيانات الصادرة عن قرنة شهوان أو تصريحاتنا عم بتطالب بانسحاب الجيش السوري, بانتشار الجيش في الجنوب اللبناني عملاً بالقرار 425 واحترام سيادة لبنان, وبصورة خاصة الانتهاء من ثقافة الخضوع والخنوع والانبطاح, فهذا كان مطلبنا فجاء القرار 1559 بدون جميلتنا يؤكد على هالمطالب فإذاً..
جيزال خوري[مقاطعةً]: طيب مش مسمّي سوريا؟
أمين جميّل [ضاحكاً]: لأ بس يعني إذا حاول يحفظ مياه الوجه حتى يفهّم سورية وغير سورية أنه آن الأوان يقعدوا على الطاولة ويحكوا حقيقةً.. يعني يحكوا كلام جد بتنفيذ ما مفروض ينفذوه على الساحة اللبنانية, إذا ما ذكروا سوريا مين عم يذكروا؟ عم يذكروا جيبوتي؟ أو عم يذكرو واجا دوغو؟؟ مين عم بيذكروا؟ يعني معروف أنه سورية, بعدين هون بتسمحي لي أنا في موضوع بحب أتوقف عليه أنه القرار 425 تَنَفَّذ, وإسرائيل انسحبت من لبنان عملاً بالقرار 425, وكل مقولة غير شيء أنو بعد في أراضي بعد محتلة وبدنا نحررها هذا كلام بغير محله..

جيزال خوري: مزارع شبعا.
أمين جميّل: مزارع شبعا.
جيزال خوري: اللّي ما بيلحظوا..
أمين جميّل: لأنه مزارع شبعا ما لها علاقة إطلاقاً بالقرار 425, والمؤسف اللّي مسؤول عن موضوع مزارع شبعا هي سورية، لأن سورية كانت هي محتلة مزارع شبعا من سنة 57، من 57 سورية واضعة اليد على مزارع شبعا, وهذا الدليل على ذلك هادي مذكرات الأستاذ سامي الصلح, كان رئيس الحكومة اللبنانية آنذاك سنة 57 رح أقرأ لك ثلاث سطور..
جيزال خوري: تفضل.
أمين جميّل: من كتاب..
جيزال خوري: سامي الصلح..
أمين جميل: سامي الصلح بيقول: "محاولة اقتطاع الأراضي وضمّها مع سكانها.. مزارع شبعا اللبنانية" هذا العنوان, وبيقول: أقدمت السلطات السورية على إقامة مخفر للدرك ومخفر آخر للمجاهدين في مزارع شبعا، كما أفادت المراجع الأمنية اللبنانية وقد أُنذر سكان مزارع شبعا - أنذروهم لسكان المزارع- من قِبل السلطات السورية بوجوب تقديم بيانات عائلية تتضمن.. تتضمن قبولهم الهوية السورية بدلاً من الهوية اللبنانية", هذه مذكرات الرئيس سامي الصلح اللّي بيقول أنه جاء لعنده رئيس البلدية والمختار، وعم يشكي همّه من هذا الأمر وأنه سامي الصلح اتصل بالسلطات.. اتصل.. كان وقتها في الوحدة بين سورية ومصر، واتصل بمجموعة من المسؤولين لا سيما المصريين ونبههم وقالوا الموضوع سوف سيترك آثاراً سليبة على الساحتين العربية والدولية بأن الأمر لم يعد قاصراً على إرسال الرجال والسلاح عبر الحدود وإنما تجاوز ذلك إلى محاولة اقتطاع حكى عن اقتطاع الأراضي وضمّها مع سكانها, يعني من سنة الـ 57 سورية واضعة اليد لذلك سنة 57 هذا للمشاهدين لازم يعرفوا تماماً شو هيّ قصة مزارع شبعا, اللّي نحنا عاملينها مسمار جحا وعم نأخذها حجة حتى ما نطبق الـ 425 وحتى نعطي ذريعة للاستمرار بانفلاش الميليشيا والجنوب ونمنع الجيش يروح على الجنوب وندّعي المقاومة وندعي مائة قصة, فإذاً مزارع شبعا محتلة من سنة الـ 57 من قبل السلطات.. قوات الأمن السورية ويعني القوى المسلحة السورية ولبنان عم بيتشكى من هذا الأمر، وأنذروا الأهالي أنهم يا بيأخذوا الجنسية السورية، يا بيتركوا المزارع, سنة الـ 67 لما إسرائيل احتلت الجولان وكان في الجيش السوري محتل مزارع شبعا اعتبرت إسرائيل مزارع شبعا من ضمن الجولان, فلذلك مزارع شبعا محتلة من سنة الـ 67 لما إسرائيل احتلت الجولان.. فإذاً.. فإذاً اليوم..