أمين جميّل: يعني هذا كله عم بيقولوه لنقول جميع القوات الأجنبية مزارع شبعة اللّي بدو يتذرع فيها على جنب..
جيزال خوري: مزارع شبعا بموجب القانون الدولي والأمم المتحدة وخرائط الأمم المتحدة مزارع شبعا هي تابعة للجولان وليس تابعة للبنان، يعني مَنَّا خاضعة إطلاقاً للقرار 425، الـ 425 تاريخه  1978 بينما احتلال مزارع شبعا هيّ سنة 1967 يعني قبل 10 سنين قبل محتلة مزارع شبعا..
جيزال خوري: بس فخامة الرئيس بيهمّ الناس أنو هالقرار 1559 شو ممكن يعطي نتائج؟ في كتير قرارات مجلس أمن، في بحق إسرائيل قرارات مجلس أمن ما صارت؟
أمين جميّل: هذا القرار قرار مهم لأنه من جهة بيلتقي مع رغبات مجموعة كبيرة من اللبنانيين, وكل الناس بتعرف شو كان موقف الرئيس الحريري من قضية انتخابات رئاسة الجمهورية, وكل الناس بتعرف ما بقى سر على حدا الضغوطات والتهديدات وأعني التهديدات اللّي مورست على بعض الشخصيات منهم نواب, قبل بيومين بقول أنا بقص إيدي ولا بقبل بالتمديد تاني يوم مثل الشاطر نزل ورفع إيده مع التمديد, ومنسمي ما بدي أجرح كرامة حدا..
جيزال خوري: نعم.
أمين جميّل: بس فينا نسمي مجموعة من النواب اللّي عملوا تصريحات قبل بثلاثة أيام منهم وزراء قريبين جداً من سوريا قالوا نحنا ما رح نقبل بالتمديد لأغراض شخصية ما بيتعدل الدستور لمصلحة شخص، وزراء قريبين لسورية ثاني يوم قلبت الأمور كلها سوا، واللي عرفناه أنه صار في تهديدات لهالأشخاص هؤلاء، تهديدات بأرواحهم وبأرزاقهم وبمصالحهم استعملت الترغيب والترهيب وهذا كله معروف.. معروف في الخارج ومعروف في الداخل، فإذاً هالقرار عم بيثبِّت الموقف اللبناني وعم بيدعم الموقف اللبناني وعم بيلتقي معه، لذلك من جهة تانية مثل ما سبق وقلت لك في بداية الحديث أنه في مسار جديد تريند في جو جديد بالمنطقة، جو جديد بيدفع باتجاه احترام حقوق الإنسان باتجاه الديمقراطية، دفع.. السعودية بدؤوا في 10 شباط في انتخابات بلديات، لأول مرة عم يعتمدوا الانتخابات..
جيزال خوري: طيب بس فخامة الرئيس يعني.. أنت بتعرف.. نعم..
أمين جميّل: ففي جو جديد يعني لذلك قرار 1559 هذا خطوة نوعية مهمة وما حدا يستخف فيها.. ما حدا يستخف فيها لأنه عم تلتقي مع مصالح استراتيجية كبيرة بعكس قرارت ثانية بالأمم المتحدة، لذلك بدنا نتوقف عليها وأنا بتمنى أن اللبنانيين وغير اللبنانيين يأخذوها بجدية ونشتغل حقيقة على تغيير الوضع في لبنان حتى ما بالنهاية يُفرض علينا ذلك بالقوة بلبنان حتى لا سمح الله أنو ندفع نحنا كشعب لبناني ثمن هذا الشيء..
جيزال خوري: بس اللبنانيين فيهم يساندوا القرار 1559؟
أمين جميّل: نحنا ما عم منقول بدنا نساند أو ما بدنا نساند، هالقرار هذا اتُخِذ بدون جميلة حدا وبدون تدخل حدا، يعني ما في لبناني تدخل أو الأمم المتحدة كلها اجتمعت وعملت كل هالمشاورات بـ 48 ساعة حتى تطلع القرار، أكيد لا فرنسا ولا أميركا ولا تشيلي أو ما بعرف من الدول اللي وافقت ما بعتقد ولا دولة كان حقيقة عم تعملوها كرمال سود عيونّا يعني، في قرار مجلس الأمن وهالقرار مجلس الأمن متل ما ذكرت هذا بيتماشى مع ما يسمى على أيام الرئيس بوش الأبOrdar New World   نظام عالمي جديد، هالشيء هذا ماشي، ليبيا عم بتغيّر، اليمن غيّرت، يعني في دول..
جيزال خوري: طيب فخامة الرئيس في مدرستين..
أمين جميّل: فإذاً لبنان عم بيغرد خارج هالسرب.. بدو يرجع لبنان..
جيزال خوري: بس في مدرستين بالسياسة بهالموضوع في ناس بتقول إنو سورية وقعت في الفخ الأميركي والإثبات هو قرار 1559، في ناس بتقول أنو السوريين رح يلتفوا على هذا القرار بصفقة ما مع الأميركيين، ويمكن ناس يعني.. الناس التانيين بيفكروا أنو ممكن بعد زيارة بيرنز لسورية، شو رأيك؟
أمين جميّل: اللّي بعتقده وهيدي يعني نوع من انطباع عام بعد يعني تتبع المواقف في أميركا وغير أميركا وبفرنسا، بعتقد في دفتر شروط جديد موضوع للمنطقة وهالدفتر الشروط بدو يتطبق وضمن دفتر الشروط في موضوع لبنان، موضوع لبنان يعني احترام سيادة لبنان واحترام النظام الديمقراطي بلبنان ما الناس بتروح على الحج وناس راجعة من الحج، لبنان كان دائماً مثال الديمقراطية، كان لبنان رسالة بالعالم العربي وتجربة نموذجية، ما بنيجي بننسفها لما بيكون كل العالم عم بيحاول يدفع العالم العربي باتجاه الديمقراطية والحرية ما ممكن لبنان يتراجع لَوَرَا، فلذلك بعتبر أنّو هالقرار 1559 هوّ خطوة متقدمة جداً وما في رجعة إلى الوراء لا في صفقة ولا غير صفقة.
جيزال خوري: أنا رح أحكي بعدين عن الصفقة، إذا بتسمح في تقرير كوفي عنان بدو يصير بعد 15 أو20 يوماً تقريباً..
أمين جميّل: نعم.
جيزال خوري: طيب أولاً أنتم كمعارضة وصلكم شي إشارات، سألوكم أسئلة جماعة الأمم المتحدة..
أمين جميّل: والله..
جيزال خوري: كيف بدو يصير..؟
أمين جميّل [ساخراً]: والله نحن ممنونين لك جداً عم تعطينا هالأهمية إنو كوفي عنان بعث يسألني ويسأل بعض رفاقنا في قرنة شهوان شو بنفكر في هيك وهيك.
جيزال خوري: بدو يعمل تقرير، كيف بدو يعمل تقرير؟
أمين جميّل: أكيد ما حدا طلب، عندهم بما يكفي من المعلومات، السفارات كِلها عم تتبع الأخبار اللبنانية، في مراقبين، في صحفيين، ما حدا غبي، كل الناس بتعرف كيف بعض النواب غيّروا من آرائهم، كل الناس بتعرف شو مستوى الفساد اللّي حصل، كل الناس بتعرف كيف بعض النواب عم ينتَخبوا، كل الناس بتعرف الوزراء عم يتصرفوا، يعني نسبة الفساد.. ونسبة الضغوطات اللّي عم بتصير والهيمنة السورية عالبلد واحتكار.. خاصة هالفساد، كل الناس بتعرف الفساد مَنُّو فقط لبناني خاصة دجون بنشر يعني صار في تلاقي مصالح لبنانية سورية بقضية الفساد، وعلى ما يبدو بتأسف المعلومات اللّي عم تجيني، ما بدنا هلأ نسترسل بالمعلومات اللّي عم تيجينا بس يعني معلومات مخيفة أن الرشوة على أعلى المستويات، وفي قضايا بينحكى عنها متل بنك المدينة، أموال العراق، يعني بعض القضايا اللّي بلّشت هلأ تتسرب بعض المعطيات عنها مخيفة، الأميركان بيعرفوها، الفرنساوية بيعرفوها، السعوديين بيعرفوها، المصاروة بيعرفوها، في ملفات عم تتركز عليها والله يستر الله يستر، لذلك ما بعتقد أبداً أنو لازم نستخف بالقرار 1559 لأنه مش بس لبنانياً بعتقد في غيرنا كمان طفح الكيل.
جيزال خوري: طيب بس يعني هذا التقرير لكوفي عنان برأيك شو بتتوقع أنو يكون؟
أمين جميّل: هالتقرير ما بتوقع.. ما حدا يفكر أن هذا يكون كبسة زر ولا أن كوفي عنان معه عصا سحري، بكرة رح يجي رح يقول ما صار كذا ما صار كذا رح نعمل ونسوّي ما بعتقد رح يكون هيك، أول تقرير رح يكون وصف الوضع، رح يقول ما بعرف أنا مني قاعد مع كوفي عنان..
جيزال خوري: لأ بس أنه.. شو ممكن يصير..؟
أمين جميّل: أنا بعرفه في صداقة بيني وبينه، في من زمان كان في علاقة، وبس مؤخراً ما حاكي معه من فترة طويلة مَنِّي حاكي معه، وفي كمان يعني غير المعطيات اللّي أنا بتصوّره أنه بدو يقول أنو مظبوط صار في ضغوطات قوية لتجديد العهد الحالي، بدو يمكن يسترسل يعني يعطي بعض المعطيات بهالناحية، وبدو يقول أنو في اتفاق طائف مفروض كان سورية تنسحب أو على الأقل تبتدئ بالأول بإعادة انتشار من سنة 93، وهذا الشيء ما صار، وبالاتفاق الطائف المفروض أنه كمان يُبحث بعد الـ 92-93 يُبحث بالانسحاب الكامل، هالشيء بعد ما حصل، بدو ينحكى بقضية الجنوب بدو يقول بالجنوب ما تَطَبَّق اللّي لبنان وعد فيه يعني انتشار الجيش ومساعدة الأمم المتحدة، لأنه الأمم المتحدة كمان هودي العسكر الموجود هونيك العسكر الدولي هودي كمان عندهم أهل ما بدهم يضلوا بعاد عن أهلهم بدهم يرجعوا على بيوتهم، لذلك هدول حتى يساعدوا الشرعية اللبنانية تنتشر، وقت الشرعية اللبنانية ما عم تنتشر عم تحرج قوات الطوارئ الدولية في الجنوب.
جيزال خوري: طيب بعد في 20 يوم ممكن يصير في انسحاب رمزي للقوات السورية مثل ما انحكى مبارح، واليوم القصة شوي معتمة، وممكن يصير في انتشار قوات سورية في لبنان، هل برأيك سورية بحاجة بعد لوجود عسكري في لبنان؟

الشكوى من الهيمنة السورية

جيزال خوري: هوّ أساساً نحنا الشكوى مَنَّا أساساً من الوجود العسكري, في كان وجود عسكري أميركي بألمانيا, وحتى أميركا تعاطت بالشؤون الداخلية الألمانية, في وجود بغير الدول, فرنسا موجودة يمكن بغير الدول ما تعاطت بالشؤون الداخلية للدول, نحنا عم نشكي أساساً من هالهيمنة السورية، أجهزة المخابرات، قضية الفساد اللّي هو كله موجَّه من دمشق هالضخ، كل القدرات اللبنانية والإمكانيات اللبنانية، دولارات وغير هيك ضخَّها إلى الشام كل يوم، عم يُحكى بأموال طائلة, عم تُضخ كل يوم من لبنان على الشام, لذلك الاقتصاد اللبناني عم يتعسر رغم كل شيء, يعني نحنا هذه الشكوى, الشكوى من طريقة التعاطي, نحن نريد نتعاطى.. يكون تعاطي مع سوريا من الند للند يكون في احترام نظام كل دولة لنظام الدولة الثانية, احترام الناس لبعضها البعض, يكون في علاقة حسن جوار، نحنا ما بدنا.. ما حدا منا مثل ما سبق وقلت بده يقتل الناطور, نحنا بدنا علاقات طبيعية بيننا وبين الشام, إنما.. ليش ما بينعمل سفارة؟ ما بعرف يعني، بين البحرين والسعودية في سفارات, بين الأردن وسوريا في سفارات, يعني كيف نحنا منقبل مثلاً سفير سوريا بلبنان يكون ضابط مخابرات بالجيش السوري؟ طيب هيدا مَنَّا كمان هيدا شيء يعني عجيبة، طيب إذا حقيقة في حياة أخوّة بين الدولتين..
جيزال خوري: جرَّبت فخامة الرئيس وقت كنت رئيس جمهورية تعمل سفير..
أمين جميّل: أكيد ما في شك حاولنا أكثر من مرة, أنا طرحت هذا الموضوع, أكثر من مرة, لأنه مشكلتنا نحنا بين لبنان وسوريا المشكلة إنو سوريا مَنَّا معترفة بعد بالكامل باستقلال لبنان, من سنة 1943 سوريا بعد ما اعترفت بالكامل..
جيزال خوري: طيب شو بيمنعها توحِّد إذا هيك؟
أمين جميّل: هلأ مجبورة تعترف يمكن لأن لبنان كان عضو مؤسس لجامعة الدول العربية, عضو مؤسس لـ.. أو عضو عامل وفاعل بهيئة الأمم, يعني ما فيها ما تعترف, بس اعترافها بلبنان اعتراف منقوص, وهذا مَنُّو شيء جديد، يعني منرجع لمذكرات خالد العظم، خالد العظم عمل مذكراته وقال إنو سنة 1943 نحنا كنا متأملين إنو رياض الصلح رجل قومي وعربي يساعد تدريجياً لضمّ لبنان إلى سوريا, وكان في يعني عم ينتقد رياض الصلح خالد العظم أنه ما ساهم بهالشيء هذا, فيما بعد أكيد صار في تقدم بالعلاقات بين لبنان وسوريا وخاصة الشعب السوري ومثقفين ونخب سورية بينت أخيراً مقالات الصحف وبيانات موقَّعة من مجموعة النخب السورية اللي عم تطالب إنو كل دولة تحترم الثانية, وكلاهما يتوجهوا باتجاه الديمقراطية واتجاه الحرية, إنما هذا كان المطلب الأساسي عند خالد العظم, ضمّ لبنان لسوريا ما نجح، رياض الصلح رجل وطني لبناني متمسك باستقلال لبنان وسيادة لبنان, وحقيقة مدرِك لأهمية لبنان كدولة مستقلة بالمحيط العربي, ومتضامنة مع الدول العربية.. إنما بس كلمتين..
أمين جميل: كلمتين بس..
جيزال خوري: لو بتنسحب سوريا اليوم شو بيصير؟
أمين جميّل: بتسمحي لي بس كلمتين؟
جيزال خوري: تفضل.
أمين جميّل: إنما المؤسف إنو اللي ما نجح خالد العظم مع رياض الصلح على ما يبدو أن الرئيس الأسد نجح مع الرئيس لحود, لأن اللي ما قدر يعمله رياض الصلح لسوء الحظ أنو اليوم عم نعيشه, وأن لبنان تدريجياً عم يفقد مقومات وجوده ومقوّمات الكيان اللبناني عم يفقدها كل يوم, عم تتفكك كل المؤسسات من دستورية, لإدارية، لحزبية, لنقابية, كل شيء عم يتفكك كل يوم بلبنان, بفضل هالسياسة المتَّبَعة من قبل الدولة, اللي ما حققه خالد العظم بهديك الوقت مع رياض الصلح, لسوء الحظ عم يتحقق اليوم مع الرئيس الحالي.
جيزال خوري: فخامة الرئيس أكيد أنا بتذكر أنو يمكن وقت كنت رئيس جمهورية قلت: همّ خليهمّ يروحو منشوف شو بيصير, بس أنا بقول لك اليوم بلبنان السؤال اللي مننسأل من كل العالم خارج لبنان خاصة والعرب بالتحديد, إنو لو تنسحب القوات السورية من لبنان شو بيصير بلبنان؟
أمين جميّل: يمكن هذا موضوع طويل, بدي حاول اختصره بكلمتين, ليش نحنا مناخد القنينة نصفها الفاضي ما مناخد نصفها المليان، نحنا من سنة 1943 لـ1967كان لبنان محط أنظار كل العالم, لجهة الديمقراطية لجهة الحرية, لجهة الازدهار, النظام الديمقراطي, يعني كان لبنان بأحلى أيامه ما كانت سورية بلبنان, هي متى بلَّشت تتفكك لبنان؟ بلَّش يتفكك لبنان وبلَّش تتدهور الأحوال السياسية والاقتصادية عنا من آخر الستينات, ولا سيما مع اتفاق القاهرة, ولما بلَّش الانفلاش الفلسطيني بلبنان، والسيادة على حساب السيادة, فنحنا خليهم يرجعونا قبل هالمرحلة هذه، تنسحب القوات الغير لبنانية من لبنان والميليشيات، نحنا بألف خير, وبرهنّا من سنة 1943 للستينات كنا نحن محط أنظار كل العالم, فليش ما مناخد هالمحطة هي منقول إذا انسحب السوري منخبِّط بعضنا؟ تفضلي قلت أننا حققنا الوحدة الوطنية المفتي القباني, والشيخ عبد الأمير قبلان, والبطرك صفير كلهم توافقوا على موقف واحد, قادرين نتوافق على موقف واحد لبنانيين مسلمين ومسيحيين, الناس اليوم توَّاقة مسلم ومسيحي, توَّاق لـ - حقيقة - لطيّ صفحة الماضي صفحة الحرب, كلنا سوا اليوم بدنا نبني لبنان الوحدة, لبنان الازدهار, لبنان الديمقراطية, لبنان الحرية, ونمشي نواكب هالعصر اللي نحنا موجودين فيه, لسوء الحظ ما عم بيخلونا.. أنا خليني.. أنا اسمحي لي أقول لك..
جيزال خوري: أنا.. طيب سؤالي إذا انسحبت سوريا والرئيس لحود ممدِّد له.. لعهده، أنتم شو بتعملوا؟
أمين جميّل: أنا معلش اسمحي لي أقول لك بدي أقول شغلتين بس, رح أقول لك إياها بدقيقتين, نحنا سنة 1969 لما حاولت فلسطين.. لما الفلسطيني فرض سيادته بشبه سيادته أو شبه سيادته على حساب سيادتنا، وفرض .. صار عنا اتفاقية القاهرة كان بهديك الوقت كانت الدولة اللبنانية على وشك إنو ترجع تستعيد سلطتها على كل الأراضي اللبنانية, بهديك الوقت سوريا منعت لبنان من أن يقوم بذلك, وحشدت جيوشها وهددت الرئيس شار حلو بتدخل الجيش السوري إذا الجيش اللبناني بدّو يوضع حد لانفلاش الفلسطيني بلبنان, ورجعت تكررت القصة سنة 1973 بعهد الرئيس فرنجية, كذلك الأمر لما الرئيس فرنجية حاول يرجع يعيد سيادة الدولة اللبنانية على كل أراضيها, كذلك الأمر سوريا حشدت جيشها على الحدود ومنعت الرئيس فرنجية من أن يقوم.. عم بعطي محطات تاريخية مش عم بخترع من عندي، مش عم بعمل شعر, هيدي محطات تاريخية- سنة 1969 وسنة 1973 سوريا منعت الدولة اللبنانية من أن تنشر جيشها وأن تستعيد سيادتها على أرضها, فإذن يتركونا لحالنا نحنا مستعدين, بعد اليوم عنا جيش جيش مهم لشو عم ندفع؟ أنا ابني بكرة رايح على التجنيد الإجباري، طيب ليش أنا بدي أضحي بابني بالتجنيد الإجباري إذا هالتضحية اللي عم يعملها ما رح تكون لسيادة البلد, إذا ما بدو الجيش اللبناني يتحمل مسؤوليته، لشو أنا بدي أضحي بشبابي؟ وثلاث أرباع الشباب عم يهربوا لبرَّة حتى ما يعملوا خدمة العلم, فإذاً عندنا جيش لبناني قادر يتحمل مسؤوليته بس بشرط هون برجع وبؤكد إنو هالشيء يكون بالتفاهم نحنا والسوريين, إذا.. هذا شيء مطلبنا نحنا مطلبنا إنو يكون بالتفاهم مع السوريين, وليس ضد السوريين، لازم نحنا وسوريا نقعد على طاولة, سوريا تعترف أولاً ببعض الحقائق وساعتها منفكر نحنا وسوريا كيف بدنا.. لأنو لبنان الآمن المستقر هو كذلك الأمر دعامة لسوريا, أما لبنان الفوضى هو كذلك الأمر لا سمح الله ممكن هالفوضى تكون عدوى كمان لسوريا, لذلك في مصلحة مشتركة، إذا كان جارك بخير إنت بخير.
جيزال خوري: نعم فخامة الرئيس قبل ما أعطي الكلمة للإعلان, بس إنو سؤالي إنو إذا انسحبت سوريا اليوم وعهد إيميل لحود ممدد ثلاث سنوات شو بتعمل؟
أمين جميّل: أنا بعتقد هيدي اللي رح تجيب الفوضى على البلد, لأنه بلى بالقمع في متران.. عفواً تليرون رجل الدولة الفرنسي الشهير أيام الثورة الفرنسية بقول ما معناه: حراب البندقية فيكِ تستعمليها لكل شيء إلا أن تستقري عليها, فقضية القمع والعسكر والجزمة هذه ما بتعمّر، ما بتعمّر أمن، ما بتعمّر سلام، ما بتدوم، بجي يوم بدها تنقلب، ما في إلا الحريات والديمقراطية هذا اللي بيدوم، إذا بقوة العسكر وقوة.. نرجع كل يوم نعمل سبعة آب جديدة كل يوم نحط حبيب يونس بالحبس، ونحط مفيد هندي بالحبس، ونحط سمير جعجع بالحبس، أو نجبر ميشيل عون يبقى بالخارج، أنا بالقوة رجعت على البلد، أنا كان أكبر تحدي لما رجعت، ما كان بدوياني ارجع بس رجعت بتحدي، فالطريق هيدي ما ممكن تستمر.. ما ممكن تستمر والدليل على ذلك ردة الفعل الدولية اللي هيّ 1559، واللي هيّ هذه ما حدا يستخف فيها.
جيزال خوري: إذا بتسمح كمان نتوقف مرة ونكون مع الفقرة الأخيرة.
[فاصل إعلاني]
جيزال خوري: فخامة الرئيس أمين جميّل بس لننهي قصة 1559، بعض العرب وبعض اللبنانيين كمان متحفظين على هذا القرار الدولي وخائفين على دولتين عربيتين هم لبنان وسوريا؟
أمين جميّل: يعني سمعنا كلام عربي بـ.. خايف على سوريا، يعني شو هالـ1559 إنو تعرضت سوريا لبعض الضغوطات، أنا بتعجب إنو طيب ليش الدول العربية كمان ما بتخاف على لبنان؟ صار لنا نحنا كذا سنة عم نتعذب ما حدا خايف علينا بعدين 1559 كمان بدو يؤثر على لبنان، لأن لبنان رح يكون أول ضحية كذلك الأمر إذا بدنا.. يعني ما بعرف شو بيؤدي.. لا سمح الله يؤدي لشيء شبيه للعراق, نحنا رح ندفع الثمن رح تصير على أرضنا القصة، فليش العرب ما بخافوا كمان على لبنان, ليش من الأول ما إجو كمان استنفروا لمساعدة لبنان, كمان لبنان عم تنتهك سيادته, كمان لبنان عم يدفع الثمن غالي للصراعات العربية, كمان لبنان بحاجة للدعم العربي, ليش بس منفكر بسورية ما منفكر بلبنان, وكل الجامعة الدول العربية المفروض يهتموا بلبنان, لبنان بحاجة لدعم العرب..

جيزال خوري: همّ عملوا الطائف..
أمين جميّل: بعدين نحنا في عنا يا ستي في لجنة ثلاثية اللي هي بالنهاية أدت إلى اتفاق الطائف، طيب كل الناس بتعرف أن اتفاق الطائف تعسر وأن وليد جنبلاط عم تذكري أنت قالها وكل الناس عم تقولها، وفي ناس دفنوه ووضعوا حجر عليه حتى ما يرجع يقوم, طيب ليش هذا مشروع عربي؟ لشو بدنا نسلم لبنان للأميركان؟ ليه؟ ليش ما العرب يجو همّ يتحملوا المسؤولية بلبنان؟ نحنا أول ناس منستلم.. يعني هيدا منرحب فيها ومنساعدن على ذلك, يجو همّ يصيروا همّ اللجنة الثلاثية يعني كانت السعودية المغرب والجزائر, هذه اللجنة الثلاثية, ليش ما بترجع هيّ راعية اتفاق الطائف مع جلالة الملك فهد خادم الحرمين الشريفين -الله يطول بعمرك ويطول بعمره- طيب ليش ما هالقيادات العربية ما هي بتجي بتعيد التزامها اتجاه لبنان؟
جيزال خوري: لأ يعني مشان هيك لبنان انسحب من 1559!!
أمين جميّل: نحنا سمعنا كلام من مسؤول سعودي كبير, قال إياها لي قال: يا عمي امشوا أنتو بالطائف ونحنا رح نضمن تطبيق الطائف بشكل يرضي سيادة لبنان واستقلال لبنان, هذا أنا سمعته, طيب ليه ما العرب خوفاً من أن تتطور الأمور لدرجة وتصير انعكاسات - لا سمح الله- مثل ما صار بالعراق, ليش ما الدول العربية بتتحمل مسؤولية تجاه لبنان؟
جيزال خوري: إنت بتتوقع يصير مثل ما صار بالعراق؟
فخامة الرئيس أمين جميّل: ما بعرف شو.. أنا ما متوقع شيء.
جيزال خوري: تتوقع أن يصير مثلاً ضرب قوات أميركية على سوريا ولبنان؟
أمين جميّل: أنا ما متوقع شيء, بس الفلتان يعني فتيشة بالجنوب ممكن تولّع كل شيء, وكلام.. يعني عم نسمع كلام خطير من هالناحية هيدي, فتيشة صغيرة ممكن تولّع..
جيزال خوري: عم نسمع كلام إسرائيلي بيقول أن لبنان سيكون البلد الآتي لتوقيع اتفاق سلام..
أمين جميّل: بس لو سمحت..
جيزال خوري: شو يعني؟
أمين جميّل: بس ما منعرف بأي إطار عم بقول, أنا ما لي ثقة بالكلام الإسرائيلي، ما ننسى أن لبنان عانى الأمرَّيْن من الاجتياح الإسرائيلي, ومن هالعداء الإسرائيلي تجاه لبنان, أول عدو لإسرائيل هو لبنان إسرائيل هذه العرب ما عم يفهمومها, إسرائيل عم تقصد التركيبة اللبنانية, لأنها البلد النموذجي هذه بتضايق إسرائيل, هذه أكبر تحدي لدولة إسرائيل التركيبة اللبنانية, النموذج اللبناني, هذا التحدي لإسرائيل.. هذا اللي إسرائيل بدها تكسروا, هذا العرب ما عم يفهموه, فنحنا اللي خايفين, نحنا اللي عم نترك هالأمر, نحنا هذا اللي بدنايّاه أن العرب يرجعوا يلتزموا القضية اللبنانية, يعطّلوا الفتيل الدولي, وقبل ما يستبقوا كل القرارات الثانية تقرير الأمم المتحدة وغيره, بيجوا على لبنان وبيرجعوا على اللجنة الثلاثية اللي راعت اتفاق الطائف واللي كانت هيّ عم تحاول تلاقي حلول للقضية اللبنانية, فبيرجعوا يساعدونا حتى نستعيد سيادتنا, نستعيد استقلالنا ونحنا والسوريين سوا يعني ما حدا بدُّه يخاصم سوريا, بس بدنا هالعرب يرجعوا يلتزموا سيادة لبنان, واستقلال لبنان وهذه بمقدمة الطائف, بمقدمة الطائف..
جيزال خوري: فخامة الرئيس..
أمين جميّل: في كل هالقضايا اللي مذكورة بالـ 1559، فيرجعوا العرب إذا ما ظبطت معهم فلكل حادث إلو حديث, بس مفروض العرب قبل ما يبكوا على غيرنا يجوا بالأول يعني.. إحنا كمان دولة عربية نحنا ملتزمين قبل غيرنا, والرئيس فرنجية راح باسم كل العرب سنة 1973 يبشر بالقضية الفلسطينية بالأمم المتحدة في نيويورك وهذه كمان نحنا دفعنا ثمنها, وقابلين ومستعدين نرجع ندفع كل الأثمان مستعدين نرجع ندفعها في سبيل قضايا العرب, بس على الأقل العرب يفرجونا إنو نحن كمان دولة جديرة أن تعيش, ولها حق تعيش بكرامة.
جيزال خوري: فخامة الرئيس أنا سألت السؤال يعني بالفقرة الثانية بس بدي ارجع أسألك إياه..
أمين جميّل: تفضلي..
جيزال خوري: اليوم إذا سمعنا بيرنز بالقاهرة بيشدد بأن المشكلة في العراق هي التسلل عبر الحدود السورية العراقية، وأنه طلب من سورية إنو يصير في اهتمام بهذا الموضوع, السفير السوري للولايات المتحدة بيقول: اتفقوا الأميركيين والسوريين على لجنة.. لجنة أمنية لمراقبة هذه الحدود, وهذه اللجنة الأمنية هي سورية عراقية أميركية، بهالمعنى فينا نقول: أن كلام الوزير الشرع الأسبوع الماضي بأنه إذا في مفاوضة للعراق منفاوض، بس المفاوضة عن لبنان أمر آخر..
أمين جميل: ما بقى في قصة..
جيزال خوري: بهالمعنى في ذكاء سياسي ما عاد في فخ سياسي..
أمين جميّل: ما بقى في.. لَيْكي هذه مش ذكاء هذه شطارة، هذا مش ذكاء, هذه تشاطر..
جيزال خوري: عم نعطيّن في العراق ولكن لبنان لنا..
أمين جميّل: أو هذا تذاكي..
جيزال خوري: ما بمشي الحال..
أمين جميّل: هذا تذاكي، ما بقى في مراوغة, ما بقى في مراوغة، في دفتر شروط, في.. مظبوط العراق عراق, لبنان لبنان, القضية الفلسطينية قضية فلسطينية, في ملفات..
جيزال خوري: هي أوراق.
أمين جميّل: وكل ملف له.. كل ملف اليوم بدُّه يتعالج على حدة، قضية لبنان ما زادوها بالصدفة, وما حركوا كل مجلس الأمن بالـ 48 ساعة حتى يأخذوا قراراً بشأن لبنان, بقى كل هالأمور هذه عم نحاول.. هذه سياسة النعامة, يمكن نحنا العرب كتير دفعنا ثمن كتير غالي سياسة النعامة, منحطّ رأسنا بالرمل حتى ما نشوف, قضية العراق تحصيل حاصل, وقضية الحدود العراقية السورية بدها تتسكر, ما لها علاقة بالموضوع اللبناني, الموضوع اللبناني موضوع مستقل, أميركا وفرنسا لما فاتوا على الأمم المتحدة أخذوا هالقرار لأنهم مقتنعين أنه آن الأوان أن لبنان يستعيد سيادته, آن الأوان أن الجيش اللبناني ينتشر بجنوب البلد, وهذا رأينا, وهذا موقفنا, وهذا مطلبنا.
جيزال خوري: فينا نقول فخامة الرئيس أن هذا الذي تتوقعه يعني في المرحلة المقبلة لأن انتهى الوقت أن هناك مرحلة جديدة وآن الأوان لـ.. يعني الحفاظ على سيادة لبنان, أو استعادة سيادة لبنان؟
أمين جميّل: أنا بعتقد أن عقارب الساعة ما بترجع للوراء, في تطور جديد بالشرق الأوسط بصورة عامة, في سياسة جديدة, في قرار جديد بالأمم المتحدة اسمه: 1559، في تصميم عالمي بأنهم يساعدوا لبنان لاستعادة سيادته لأن لبنان هو النموذج الديمقراطي الفريد من نوعه بمنطقة الشرق الأوسط, وبدُّن يساعدوه يرجع يوقف على رجليه, وأنا مقتنع أننا نحن بأول خطوة نحن بصددها اليوم, وفي بعتقد أمل كبير أن لبنان يرجع يستعيد سيادته واستقلاله وحقيقة يكون.. يرجع يتحقق فيه المثل اللي بيقول: نيال من له مرقد عنزة في جبل لبنان.
جيزال خوري: شكراً فخامة الرئيس أمين الجميّل, شكراً للمشاهدين وإلى اللقاء الأسبوع المقبل.